長澤會對抗澤尻會？

筆者係昨日睇到某雜誌中嘅一篇報導，內容講述於零五年憑日劇《一公升眼淚》上位的沢尻エリカ，因為唔順長澤まさみ於上年所主演嘅新戲《愛與淚相隨》收得，動搖其一姐地位，故為咗要收復失地，竟聯同其他圈中好友組成「澤尻會」，齊齊唱衰長澤；而長澤眼見澤尻踩到上心口，亦隨即聯同其親密戰友組織「長澤會」作反擊。

其實佢地兩個咁做嘅話就兩個都唔低幫，但根據該雜誌從日本方面嘅消息及調查所透露，日本人始終覺得清純玉女長澤低幫啲，而澤尻更成為最討厭女優 No.1；除此之外，該雜誌亦在香港街頭訪問過一些路人，結果同日本方面嘅一樣，大部份都話長澤好過澤尻好多，有啲重話澤尻個樣越嚟越串。

呢單野係唔係真筆者就真係唔知，但係筆者一睇完呢段報導就真係覺得好笑，講真，娛樂圈明爭喑鬥真係唔出奇，以長澤及澤尻呢兩個當紅姐仔嚟講更加唔出奇，之不過好似報導咁重拉埋其他圈中人幫手組織乜乜會就有少少怪，如果事件屬實，睇怕佢地兩個都有排鬥，重分分鐘激過《戰狼３００》…

以下資料皆引用自該雜誌

長澤會成員：

• 副會長–綾瀨遙
  長澤同綾瀨遙分別做過《在世界中心呼喚愛》嘅電影及電視版的關係而成為好友，故姊妹俾人恰當然要力撑。
• 會員–戸田恵梨香
  與綾瀨遙分屬好友，被綾瀨遙拉攏入會對抗澤尻。
• 會員–宮崎葵
  因為睇唔過澤尻態度囂張，而自願入會幫拖。

澤尻會成員：

• 副會長–若襯千夏
  因知若襯人緣甚廣，故澤尻極力游說其入會，利用佢招攬多啲成員。
• 會員–上野樹里
  同澤尻係中學同學，澤尻會成立後即爭住入會，唱衰死敵長澤。
• 會員–伊藤英明
  據說起初佢以為個會係溝女飯局，之後先發現係是非圈，但玩落又覺得幾好玩。